వరంగల్ దేవి నవరాత్రుల ఉత్సవాలలో శ్రీ స్వాత్మానందేంద్ర స్వామివారి దేవి పీఠ పూజ…!

ఉమ్మడి వరంగల్ జిల్లాలో ఆదివారం నాడు విశాఖ శ్రీ శారదాపీఠం ఉత్తరాధికారి శ్రీ స్వాత్మానందేంద్ర సరస్వతి స్వామి వారి తెలంగాణ ధర్మ ప్రచార యాత్ర ప్రారంభమైన సంగతి తెలిసిందే. ధర్మ ప్రచార యాత్రలో భాగంగా నిన్న హన్మకొండలోని కెప్టెన్ లక్ష్మీకాంతరావు నివాసంలో నిర్వహిస్తున్న దేవి నవరాత్రులలో పాల్గొన్న స్వామివారు దేవి పీఠ పూజ నిర్వహించారు. తదనంతరం వేయి స్థంభాల గుడిలో రుద్రేశ్వరుడికి అభిషేకం చేసి, ప్రత్యేక పూజలు నిర్వహించారు. ఈ సందర్భంగా గుడిలో నవరాత్రుల ఉత్సవాలను ప్రారంభించిన స్వామివారు..అమ్మవారికి కూడా ప్రత్యేక పూజలు నిర్వహించారు. తదనంతరం భక్తులకు అనుగ్రహం భాషణం ఇచ్చారు. ఇక అక్టోబర్ 8 వరకు కెప్టెన్ లక్ష్మీకాంత రావు నివాసంలో నిర్వహిస్తున్న నవరాత్రుల కార్యక్రమంలో స్వామివారు రాజశ్యామల వారికి ప్రత్యేక పూజలు నిర్వహిస్తారు. ఈ మేరకు ఇవాళ ఉదయం శ్రీ స్వాత్మానందేంద్ర స్వామివారు రాజశ్యామల వారికి పీఠ పూజ నిర్వహించి, భక్తులకు తీర్థ ప్రసాదాలు అందజేశారు. తదనంతరం భక్తులను ఉద్దేశించి స్వామివారు అనుగ్రహభాషణం చేశారు. అలాగే ఈ రోజు జన్మదినం జరుపుకున్న కెప్టెన్ కుమారుడు, హుస్నాబాద్ ఎమ్మెల్యే ఒడితల సతీష్‌ కుమార్‌‌కు స్వామివారు ఆశీస్సులు ఇచ్చారు. ఈ కార్యక్రమంలో రాజ్యసభ సభ్యులు కెప్టెన్ లక్ష్మీకాంతరావు దంపతులు, హుస్నాబాద్ ఎమ్మెల్యే ఒడితల సతీష్‌కుమార్ దంపతులు, దరువు ఎండీ సిహెచ్‌. కరణ్ రెడ్డి తదితరులు పాల్గోన్నారు. ఈ నవరాత్రుల పూజా కార్యక్రమానికి పెద్ద ఎత్తున భక్తులు తరలివచ్చి..స్వామివారి ఆశీస్సులు పొందారు.