చింప‌బ‌డ్డ ‘ఎన్టీఆర్‌’ పేజీల‌ను మ‌ళ్లీ అతికిస్తా :చ‌ంద్ర‌బాబు వ్యాఖ్య‌ల‌కు రామ్‌గోపాల్ వ‌ర్మ రిప్లై

త‌న త‌దుప‌రి చిత్రం ‘లక్ష్మీస్ ఎన్టీఆర్‌ అంటూ టైటిల్ ప్ర‌క‌టించిన‌ప్ప‌టి నుంచి రామ్‌గోపాల్ వ‌ర్మ సంచ‌నాల‌కు కేరాఫ్ అడ్ర‌స్‌గా మారారు. ఈ చిత్రంపై రోజుకో వివాదం పుట్టుకొస్తోంది. ఈ సినిమాకు వైసీపీ నేత నిర్మాత కావడంతో… వ్యవహారం మొత్తం రాజకీయ రంగును పులుముకుంది. టీడీపీ నేతలు వర్మపై రోజుకో కామెంట్ చేయడం… ఆ విమర్శలకు సోషల్ మీడియా ద్వారా వర్మ సమాధానం ఇవ్వడం పరిపాటిగా మారింది. ఈ అంశంపై ముఖ్యమంత్రి చంద్రబాబు నిన్న స్పందించారు. ఈ సినిమాకు అనవసర ప్రధాన్యతను ఇచ్చి, లేనిపోని ప్రచారం కల్పించవద్దంటూ తన పార్టీ నేతలకు ఆయన సూచించారు. ఈ నేపథ్యంలో, వర్మ నేరుగా చంద్రబాబుకే రిప్లై ఇచ్చారు. ఆయన రిప్లై ఆయన మాటల్లోనే….

ఈ సినిమాలో నిజాలను వక్రీకరిస్తే ప్రజలు హర్షించరు అంటూ ముఖ్యమంత్రి చంద్రబాబు నాయుడు చేసిన వ్యాఖ్యలు ముమ్మాటికీ నిజం. అందుకే జరిగిన నిజాలను ఏమాత్రం వక్రీకరించకుండా, సినిమా తీయబోతున్నాను.
చంద్రబాబు గారు అన్నట్టు ఎన్టీఆర్ జీవితం తెరిచిన పుస్తకమే. ఆ పుస్తకంలో చిరిగిపోయిన లేదా చింపబడ్డ చాలా పేజీలను ఈ సినిమా ద్వారా తిరిగి అతికించబోతున్నానంటూ చంద్ర‌బాబు కామెంట్ల‌కు డైరెక్ట‌ర్ రామ్‌గోపాల్ వ‌ర్మ రిప్లై ఇచ్చారు.