మోతాదుకు మించిన అర్జున్

సినిమా పరిభాషలో కల్ట్ మూవీస్ అన్న ఒక పేరు ఉంది. ఇది పలకడానికి చాలా ఈజీగా ఉంటుంది కానీ, ఆ స్థాయిని సాధించాలంటే మాత్రం అతి కష్ట సాధ్యం. ఎంతో అద్భుతంగా తీసిన సినిమాలు సైతం కల్ట్ మూవీగా పేరు తెచ్చుకోలేకపోయాయి. ఒక సినిమా ఆ స్థాయి సాధించాలంటే, కష్టపడితే సరిపోదు, క్రియేటివిటీ ఉంటే సరిపోదు, కలెక్షన్స్ వచ్చినా సరిపోదు. వీటిన్నింటికీ అది అతీతం. ఉదాహరణకు చెప్పాలంటే, రామ్ గోపాల్ వర్మ ‘శివ’ ఒక కల్ట్ మూవీ. కల్ట్ స్టేటస్ సాధించిన సినిమాలు ఎన్ని తరాలైనా ప్రజల మనసుల్లో నిలిచిపోయి ఉండిపోతాయి. ఇంకా చెప్పాలంటే, కాలం గడిచేకొద్దీ వాటి విలువ పెరుగుతుంటుంది. గత ఇరవై ఏళ్లలో ఇలా కల్ట్ స్టాటస్ సాధించిన సినిమాల్ని వేళ్ల మీద లెక్కించవచ్చు. ఆ కోవలోకి చేరుతుంది 2017లో రిలీజైన ‘అర్జున్ రెడ్డి.’

అర్జున్ రెడ్డిని తెరకెక్కిస్తున్న సమయంలో, చాలా చిన్న సినిమాల్లాగే, ఇది కూడా ఇలా వచ్చి అలా వెళ్లిపోతుందని భావించారు ఇండస్ట్రీ జనాలు, ప్రేక్షకులు. అయితే, అది తప్పని ట్రైలర్ చూడగానే అందరికీ అర్ధమైపోయింది. మ్యూజిక్, పెర్ఫామెన్స్, కథ చెప్పిన విధానం చూసి, ఆడియన్స్ ఫ్లాట్ అయిపోయారు. ఈ సినిమా ఖచ్చితంగా ఏదో మ్యాజిక్ చేయబోతోందనే ఫీలింగ్ వచ్చేసింది. ప్రేక్షకుల్లో సైతం, సినిమాకు, కథానాయకుడు విజయ్ దేవరకొండకు భీభత్సమైన ఫాలోయింగ్ ఏర్పడింది. ముఖ్యంగా యూత్ అంతా సినిమా ఎప్పుడు విడుదలవుతుందా అని ఎదురుచూశారు. మరోపక్క ముద్దు పోస్టర్ కాంట్రవర్సీ కూడా సినిమాకు ప్లస్సయింది.

అయితే, సినిమాలో మోతాదుకు మించి అడల్ట్ కంటెంట్ ఉందంటూ, చాలా మంది సినిమాను ఏకేశారు. అవేమీ కలెక్షన్లపై ప్రభావం చూపించలేదు. పైపెచ్చు, సినిమాలో ఏముందో చూద్దామని మరింతమంది థియేటర్లకు వెళ్లారు. మొత్తమ్మీద అన్ని కాంట్రవర్సీల మధ్య ఆగస్ట్ 25న విడుదలైన అర్జున్ రెడ్డి, విమర్శకులు కూడా ఆశ్చర్యపోయేంత విజయాన్ని సొంతం చేసుకుంది. హీరో విజయ్ దేవరకొండను సూపర్ స్టార్ చేసేసింది. మొదటి షో పడినప్పటి నుంచే సినిమా అద్భుతమైన రెస్పాన్స్ వచ్చింది. యూత్ అంతా థియేటర్లకు క్యూ కట్టి బ్రహ్మరథం పట్టేసి, కల్ట్ మూవీ స్టేటస్ ను కట్టబెట్టేశారు.

పూర్తి రియలిస్టిక్ గా, యూత్ ఆడియన్స్ ను టార్గెట్ చేస్తూ, ఎక్కడా శృతిమించకుండా సినిమాను తెరకెక్కించడంలో దర్శకుడు సందీప్ వంగా సూపర్ సక్సెస్ అయ్యాడు. 2017 టాప్ మూవీస్ లో అర్జున్ రెడ్డిని నిలిపాడు.