అదేంటి.. ప్రభాస్‌ గురించి రాజమౌళి అంతమాట అనేశాడు!

తెలుగు రాష్ట్రాలతో పాటు దేశవ్యాప్తంగా సినీ అభిమానుల కళ్లన్నీ ఇప్పుడు RRR సినిమాపైనే ఉన్నాయి. ఈనెల 25న మూవీ రిలీజ్‌ అవుతుండటంతో ఎప్పుడు చూసేస్తామా అనే ఆతృతలో ఉన్నారు. పాన్‌ ఇండియా సినిమా కావడంతో బాలీవుడ్‌తో పాటు తెలుగు, తమిళ, మలయాళం, కన్నడ భాషల్లో ఈ సినిమా విడుదల అవుతోంది. రిలీజ్‌ టైమ్‌ దగ్గరపడుతుంటంతో మూవీ టీమ్‌ ప్రమోషన్‌ ఈవెంట్స్‌ వేగాన్ని పెంచింది. ఇప్పటికే పలు ఇంటర్వ్యూలు, చిట్‌ చాట్‌ కార్యక్రమాలు పూర్తిచేసుకుంది. ఈరోజు నుంచి ఈనెల 23 వరకు మూవీ టీమ్‌ మరింత బిజీబిజీగా గడపనుంది. దుబాయ్‌తో పాటు మనదేశంలోని పలు ప్రధాన నగరాల్లో ప్రచార కార్యక్రమాలు నిర్వహిస్తోంది. ఇప్పటికే ఆర్‌ఆర్‌ఆర్‌ దర్శకుడు రాజమౌళి, హీరోలు ఎన్టీఆర్‌, రామ్‌చరణ్‌ దుబాయ్‌ చేరుకుని అక్కడ ప్రమోషన్‌ ఈవెంట్స్‌లో పాల్గొంటున్నారు. 

ఇదిలా ఉండగా ఇటీవల ఓ ఇంట్లో రాజమౌళి, ఎన్టీఆర్‌, రామ్‌చరణ్‌ మధ్య జరిగిన సంభాషణ సోషల్‌ మీడియాలో వైరల్‌ అవుతోంది.  ‘ఆర్‌ఆర్‌ఆర్‌’ మూవీ టీమ్‌ ‘ఆఫ్‌ ద రికార్డ్‌’ పేరుతో ఓ వీడియోను సోషల్‌ మీడియా ద్వారా విడుదల చేసింది. అందులో RRR షూటింగ్‌ సమయంలో జరిగిన విశేషాలతో పాటు సినిమా ప్రమోషన్‌కు సంబంధించిన విషయాలపై ఆ ముగ్గురూ చర్చించుకున్న వీడియోను రికార్డ్‌ చేసి బయటకు వదిలారు.

అందులో రాజమౌళి, ఎన్టీఆర్‌, రామ్‌చరణ్‌ మధ్య జరిగిన సంభాషణ నవ్వులు పూయిస్తోంది. సినిమా రిలీజ్‌ రోజు నేను కూడా నీతో వస్తా జక్కన్న అని రాజమౌళితో ఎన్టీఆర్‌ అనగా.. మీ ఇద్దరూ వెళ్లని థియేటర్‌కు నేను వెళ్తానని ఆయన సమాధానం ఇవ్వడం ఫన్‌ క్రియేట్‌ చేసింది. ముఖ్యంగా ప్రభాస్‌ని ప్రీమియర్‌ షోకు తీసుకెళ్దామని ఎన్టీఆర్‌ అనగా.. అది జరిగే పని కాదు అని రాజమౌళి చెప్పారు. ప్రభాస్‌ ప్రీమియర్‌ షోకు రాడన్నారు. ‘డార్లింగ్‌ వద్దు డార్లింగ్‌’ అనే సమాధానం ప్రభాస్‌ నోటి నుంచి వస్తుందని రాజమౌళి ఎన్టీఆర్‌తో నవ్వుతూ చెప్తాడు. ఇలాంటి ఎన్నో ఇంట్రెస్టింగ్‌ టాపిక్స్‌ ఆ వీడియోలో ఉన్నాయి.