komatireddy: కోమటిరెడ్డి వెంకట్ రెడ్డి పర్యటనలో ఉద్రిక్తత

komatireddy: నల్లగొండలో ఎంపీ కోమటిరెడ్డి వెంకట్ రెడ్డి పర్యటనలో ఉద్రిక్తత చోటుచేసుకుంది. నల్లగొండ జిల్లా శాలిగౌరారం మండలం ఇటుకలపాడులో పర్యటించారు. ఈ పర్యటనలో భారాస, కాంగ్రెస్ కార్యకర్తల మధ్య గొడవ తలెత్తింది. బొడ్రాయి విగ్రహ ప్రతిష్ట కార్యక్రమానికి ఎంపీ కోమటిరెడ్డి వెంకటరెడ్డి హాజరయ్యారు.

రాష్ట్రంలో రోడ్ల పరిస్థితి బాగోలేదని……ఇక్కడకు రావడానికి 3 గంటలకు పైగా సమయం పట్టిందని భారాస ప్రభుత్వంపై విమర్శలు గుప్పించారు. అయితే అక్కడ కోమటిరెడ్డి వ్యాఖ్యలు…..భారాస కార్యకర్తలకు ఆగ్రహం తెప్పించాయి. ఏ కార్యక్రమం కోసం వచ్చారో అది చూసి వెళ్లాలిగానీ ఇలా ఇష్టానుసారం మాట్లాడటం సరికాదన్నారు. చెత్త రాజకీయాలు చేస్తున్నారని మండిపడ్డారు.

దీంతో ఎంపీ కోమటిరెడ్డి వెంకటరెడ్డిపై కుర్చీలు, కర్రలతో దాడి చేసేందుకు భారాస కార్యకర్తలు యత్నించారు. కోమటిరెడ్డి ప్రసంగాన్ని అడ్డుకున్నారు. దీంతో భారాస నాయకులు, కాంగ్రెస్ నాయకుల మధ్య తోపులాట జరిగింది. ఇదే క్రమంలో ఎంపీ కోమటిరెడ్డి అక్కడినుంచి తప్పించుకున్నారు.

పోలీసులు వెంటనే రంగ ప్రవేశం చేసి పరిస్థితి చక్కబెట్టేందుకు యత్నించారు.