సూర్యాపేట జిల్లాలో ఘోర రోడ్డు ప్రమాదం.. ఐదుగురి దుర్మరణం!

తెలంగాణ రాష్ట్రంలోని సూర్యాపేట జిల్లా మునగాల సమీపంలో శనివారం అర్ధరాత్రి ఘోర రోడ్డు ప్రమాదం జరిగింది. ఈ ఘటనలో ఐదుగురు అక్కడికక్కడే ప్రాణాలు విడిచారు. మరో పది మంది తీవ్రంగా గాయపడడంతో వారి పరిస్థితి విషమంగా ఉంది.

మునగాల మండల కేంద్రం శివారులోని పెట్రోలు బంక్‌ వద్ద ఓ ట్రాక్టర్, లారీని ఢీకొట్టింది. ట్రాక్టర్ రాంగ్ రూట్‌లో వెళ్లడం వల్లనే ఈ ఘటన జరిగింది. ఘటనా స్థలానికి సమీపంలోని సాగర్ ఎడమ కాలువ గట్టుపై ఉన్న అయ్యప్పస్వామి ఆలయంలో శనివారం రాత్రి మహామడి పూజ నిర్వహించారు. ఇందుకు హాజరైన వారిలో దాదాపు 38 మంది ట్రాక్టర్ ట్రాలీలో తమ ఇళ్లకు తిరుగు ప్రయాణమయ్యారు. వారంతా ప్రయాణిస్తున్న ట్రాక్టర్ విజయవాడ- హైదరాబాద్ నేషనల్ హైవేపై రాంగ్ రూట్‌లో వెళ్లింది. దీంతో ఎదురుగా వస్తోన్న లారీని ఢీ కొట్టింది.

ఘటనలో గాయపడిన వారిని ఆసుపత్రికి తరలించేందుకు అంబులెన్సులు సరిపోలేదు. దీంతో అందుబాటులో ఉన్న వాహనాల్లో క్షతగాత్రులను హాస్పిటల్‌కి తరలించారు. పరిస్థితి విషమంగా ఉన్న వారిని ఖమ్మం, సూర్యాపేట హాస్పిటల్‌కి తరలించారు.