మునుగోడు ‘గులాబీ’మయం.. శ్రేణుల సంబరాలు!

నువ్వా- నేనా.. అంటూ సాగిన మునుగోడు పోరులో టీఆర్‌ఎస్‌ పార్టీ సత్తా చాటింది. ప్రతి రౌండ్‌లోనూ టీఆర్‌ఎస్, బీజేపీల మధ్య పోటీ హోరాహోరీగా సాగింది. ఫైనల్‌గా 10,309 ఓట్ల మెజారీటీతో టీఆర్‌ఎస్ అభ్యర్థి కూసుకుంట్ల ప్రభాకర్ రెడ్డి ఘన విజయం సాధించారు.

మొత్తం 15 రౌండ్లలతో ఓట్ల లెక్కింపు జరగగా.. 2,3 రౌండ్లు తప్పితే మరే రౌండ్‌లోనూ బీజేపీ సత్తా చాటలేకపోయింది. పోస్టల్‌ బ్యాలెట్‌ ఓట్లలోనూ టీఆర్‌ఎస్ పార్టీయే ముందంజలో నిలిచింది. ఈ పోస్టల్ బ్యాలెట్ ఓట్లలో అధికార పార్టీకి 4 ఓట్ల ఆధిక్యం లభించింది. మొత్తానికి 15వ రౌండ్ ముగిసేసరికి 10,309 మెజారిటీతో కారు జోరు చూపించింది. దీంతో తెలంగాణ భవన్ దగ్గర టీఆర్‌ఎస్ శ్రేణులు పెద్ద సంఖ్యలో బాణాసంచా కాల్చుతూ.. స్వీట్స్ పంచారు.