ప్రేమ.. పెళ్లి.. 3 నెలల్లోనే ఆత్మహత్య!

కుప్పంలో దారుణం చోటుచేసుకుంది. ప్రేమించి.. పెద్దల అంగీకారంతో ఒక్కటైయ్యారు ఆ జంట. ఎంతో హ్యాపీగా ఉన్నారు. వివాహ బంధంలోకి అడుగుపెట్టి మూడు నెలలు పూర్తవక ముందే ఆమె అనుమానాస్పద రీతిలో శవమై కనిపించింది.

పాతపేటకు చెందిన రోహిత్, భువనేశ్వరి ప్రేమించుకున్నారు. ఇరువైపుల పెద్దలను ఒప్పించి రెండు నెలల క్రితం పెళ్లి చేసుకున్నారు. గురువారం మధ్యాహ్నం వరకూ అందరితో సంతోషంగా ఉన్న భువనేశ్వరి సాయంత్రానికి మేడమేద ఉన్న గదిలో దూలానికి వేలాడుతూ శవమై కనిపించింది.

విషయం తెలుసుకున్న పోలీసులు ఘటనాస్థలానికి చేరుకొని భువనేశ్వరి మృతదేహాన్ని కుప్పం గవర్నమెంట్ ఏరియా హాస్పిటల్‌కు తరలించారు. మరోవైపు అత్తింటివారే తమ కూతుర్ని చంపేశారని మృతిరాలి బంధువులు ఆరోపిస్తున్నారు. కేసు నమోదు చేసిన పోలీసులు దర్యాప్తు చేస్తున్నారు.