చంద్రబాబుకు వాళ్లిద్దరే గురువులు: మంత్రి బొత్స

టీడీపీ అధినేత చంద్రబాబుకు మానవత్వం, విలువలు లేవని.. పండగ రోజు కూడా రాజకీయ ఉపన్యాసాలు ఇస్తూ గురువలను అవహేళన చేస్తున్నారని మంత్రి బొత్స సత్యనారాయణ విమర్శించారు. తాడేపల్లిలోని వైసీపీ కార్యాలయంలో మీడియాతో ఆయన మాట్లాడారు.

టీచర్స్‌ డే సందర్భంగా రాష్ట్రంలోని 176 మంది ఉత్తమ ఉపాధ్యాయులను సీఎం సత్కరించారని.. ఈ విషయం టీడీపీ నేతలకు మింగుడు పడటం లేదని వ్యాఖ్యానించారు. వెన్నుపోటుకు ఆజ్యం పోసిన రామోజీరావు, రాధాకృష్ణలే చంద్రబాబుకు గురువులు అని బొత్స వ్యాఖ్యానించారు. టీడీపీ హయాంలో విద్యారంగానికి ఏం చేశారో రెండు ముక్కల్లో చెప్పగలరా అని నిలదీశారు.

జగన్‌ సీఎం అయిన తర్వాత ఫౌండేషన్‌ స్థాయి నుంచి విద్యారంగంలో సమూల మార్పులు తీసుకొచ్చామని .. ఈ విషయాన్ని గర్వంగా చెప్పుకొంటామన్నారు. చంద్రబాబు ఇష్టపడే రోజు సెప్టెంబర్ 5 కాదని.. వెన్నుపోటు పొడిచిన రోజంటే ఆయనకు ఇష్టం బొత్స సత్యనారాయణ ఎద్దేవా చేశారు.