అయ్యో.. మహేశ్‌బాబు అలా అనలేదు: స్పందించిన టీమ్‌

ప్రముఖ నటుడు మహేశ్‌బాబు ఇటీవల చేసిన కొన్ని వ్యాఖ్యలపై దుమారం రేగుతుండటంపై ఆయన టీమ్‌ స్పందించింది. మహేశ్‌బాబుకు అన్ని భాషలు సమానమేనని.. ఆయన మాటల్ని కొంతమంది తప్పుగా అర్థం చేసుకున్నారని వెల్లడించింది.

వివరాల్లోకి వెళితే.. మేజర్‌ సందీప్‌ ఉన్ని కృష్ణన్‌ జీవితాధారంగా ‘మేజర్‌’ సినిమాని రూపొందిస్తున్నారు. ఈ సినిమాకు మహేశ్‌బాబు నిర్మాతగా ఉన్నారు. ఇటీవల ఈ మూవీ ట్రైలర్‌ రిలీజ్‌ కార్యక్రమానికి మహేశ్‌బాబు వెళ్లారు. ఆ తర్వాత ఈ మూవీపై ఓ నేషన్‌ న్యూస్‌ ఏజెన్సీకి ఇంటర్వ్యూ ఇచ్చారు. ఆ ఇంటర్వ్యూలో మహేశ్‌ చేసిన కామెంట్స్‌ వైరల్‌గా మారాయి.

బాలీవుడ్‌ ఎంట్రీపై ఇంటర్వ్యూలో ప్రశ్నించగా.. బాలీవుడ్‌ తనని భరించలేదని.. అందుకే అక్కడికి వెళ్లి టైమ్‌ వేస్ట్‌ చేసుకోలేదని ఆయన చెప్పినట్లు కొన్ని ఇంగ్లిష్‌ పేపర్లలో వార్తలొచ్చాయి. అంతేకాకుండా టాలీవుడ్‌లో ప్రేక్షకుల అభిమానం పొందడం ఆనందంగా ఉన్నట్లు మహేశ్‌ పేర్కొన్నట్లు ఆయా పత్రికలు రాశాయి. దీంతో మహేశ్‌బాబు కామెంట్స్‌ను బాలీవుడ్‌ ప్రేక్షకులు తప్పుబడుతున్నారు.

ఈ నేపథ్యంలో మహేశ్‌ టీమ్‌ స్పందించింది. ఆయనకు చెప్పిన మాటల్ని కొంతమంది తప్పుగా అర్థం చేసుకుని ఈవిధంగా వార్తలు రాశారని పేర్కొంది. ఎన్నో ఏళ్లుగా తెలుగులోనే సినిమాలు చేయడం వల్ల మిగతా ఇండస్ట్రీలతో పోలిస్తే తాను సౌకర్యంగా ఫీలవుతానని మాత్రమే ఆయన చెప్పారని మహేశ్‌ టీమ్‌ వెల్లడించింది.