ఉదయం టిఫిన్‌ స్కిప్‌ చేస్తున్నారా? అయితే ఇది చదవండి..!

సరైన సమయానికి ఆహారం తీసుకుంటేనే మన ఆరోగ్యం బాగుంటుంది. ముఖ్యంగా ఉదయం టిఫిన్‌ను ఎట్టి పరిస్థితుల్లోనూ స్కిప్‌ చేయకూడదు. మధ్యాహ్న భోజనానికి కూడా అంతే ప్రాధాన్యత ఇవ్వాలి. ఉదయాన్ని లేచిన తర్వాత మొదటి రెండు గంటల్లో పొట్ట నింపుకోవాలి. అలా తినకపోతే ఎన్నో అనర్థాలు చుట్టుముట్టేప్రమాదముందని.. సమస్యలు కొనితెచ్చుకుంటున్నట్లేనని న్యూట్రిషనిస్టులు హెచ్చరిస్తున్నారు.

రాత్రంతా ఆహారం లేకుండా పొట్ట ఖాళీగా ఉండటంతో జీవక్రియల వేగం తగ్గిపోతుంది. ఎనర్జీ తగ్గిపోయి నిస్సత్తువ వచ్చేస్తుంది. అందుకే ఉదయాన్నే టిఫిన్‌ చేస్తే ఆ సమస్య ఉండదు. అంతేకాకుండా ఎక్కువసేపు పనిచేయడానికి కావాల్సిన శక్తి దొరుకుతుంది. బరువు తగ్గాలని అనుకునేవారు ఉదయం కచ్చితంగా టిఫిన్‌ తీసుకోవాలి. టిఫిన్‌లో గుడ్లు, పాలు, పండ్లు, పొట్టుతీయని గింజలు ఉండేలా చూసుకుంటే మంచి పోషకాలు శరీరానికి అందుతాయి.

మధ్యాహ్నం లంచ్‌ చేయడం మానేసినా శక్తి తగ్గిపోతుంది. అంతేకాదండోయ్‌ గ్యాస్‌, అసిడిటీ వంటి సమస్యలు కూడా పెరుగుతాయి. బరువు తగ్గిపోవాలని ఎలాంటి శారీరక శ్రమ చేయకుండా లంచ్‌ మానేయడం వల్ల ఉపయోగం ఉండదు. తీసుకునే ఫుడ్‌లో రంగు రంగుల కూరగాయలు, పండ్లు ఉంటే చాలా మంచిది.