హైదరాబాద్‌ మెట్రోలో ‘సూపర్‌ సేవర్‌’ వచ్చేసింది!

హైదరాబాద్‌ మెట్రో రైలు ప్రయాణికులకు ఎంతో ప్రయోజనం చేకూర్చే  ‘సూపర్‌ సేవర్‌’ ఆఫర్‌ అమల్లోకి వచ్చింది. నేటి నుంచి అన్ని మెట్రో స్టేషన్లలో దీనికి సంబంధించిన కార్డులను అందజేస్తున్నారు. మెట్రో రైలు యాజమాన్యం పేర్కొన్న విధంగా ప్రతి నెల మొదటి, నాలుగో శనివారాలు, అన్ని ఆదివారాలు, ఇతర పండగలు కలిపి ఏడాదిలో మొత్తం 100 రోజుల పాటు ఈ సూపర్‌ సేవర్‌ ఆఫర్‌ వర్తిస్తుంది.

ఆయా రోజుల్లో కేవలం రూ.59కే రోజంతా మెట్రోలో ప్రయాణించవచ్చు. అయితే ఆ కార్డు కావాలనుకునే వాళ్లు మొదట రూ.50 చెల్లించాలి. ఆపై రూ.59 చొప్పున రీఛార్జ్‌ చేసుకోవాల్సి ఉంటుంది. మెట్రో రైలు కౌంటర్ల వద్ద ఈ కార్డులు అందుబాటులో ఉన్నాయి.  ఈ కార్డులతో హైదరాబాద్‌ పరిధిలోని 57 మెట్రో స్టేషన్ల మధ్య ఎన్నిసార్లయినా తిరగొచ్చు.