సెట్లో హీరో సాయిధరమ్‌ తేజ్‌ ఎమోషనల్‌

కొన్ని నెలల క్రితం హైదరాబాద్‌ గచ్చిబౌలి వద్ద జరిగిన రోడ్డు ప్రమాదంలో తీవ్రంగా గాయపడిన హీరో సాయిధరమ్‌ తేజ్‌ పూర్తిగా కోలుకున్నారు. సోమవారం తన కొత్త సినిమా షూటింగ్‌కు కూడా హాజరయ్యారు. కార్తిక్‌ దండు డైరెక్షన్‌లో నిర్మిస్తున్న ఈ కొత్త సినిమాకు ప్రముఖ దర్శకుడు సుకుమార్‌, బీవీఎస్‌ఎన్‌ ప్రసాద్‌ నిర్మాతలుగా వ్యవహరిస్తున్నారు.

అయితే చాలా రోజుల తర్వాత సినిమా సెట్లో సాయిధరమ్‌తేజ్‌ అడుగుపెట్టడంతో చిత్ర బృందం ఆయనకు ఘన స్వాగతం పలికింది. కొందరు ‘వెల్‌కమ్‌ బ్యాక్‌ సాయితేజ్‌’ అనే బోర్డులతో స్వాగతం పలికగా.. మరికొందరు పూల వర్షం కురిపించారు. మూవీ టీమ్‌ తనపై చూపిస్తున్న అభిమానికి సాయిధరమ్‌ తేజ్‌ ఎమోషనల్‌ అయ్యారు.  తనపై ఇంతటి ప్రేమ చూపుతున్న వారందరికీ ఆయన థాంక్స్‌ చెప్పారు.  దీనికి సంబంధించిన వీడియోను మూవీ టీమ్‌ సోషల్‌ మీడియాలో రిలీజ్‌ చేసింది.