‘ఎఫ్ 3’ విడుదల Date మళ్లీ మారింది..?

సీనియర్ నటుడు.. స్టార్ హీరో విక్టరీ వెంకటేశ్, మెగా ప్రిన్స్ వరుణ్ తేజ్ హీరోలుగా అనిల్ రావిపూడి తెరకెక్కిస్తున్న నవ్వుల విందు ‘ఎఫ్ 3’. ‘సమ్మర్ సోగ్గాళ్లు’ ట్యాగ్ లైన్ తో రాబోతున్న ఈ సినిమా సూపర్ హిట్ ‘ఎఫ్ 2’ చిత్రానికి సీక్వెల్ అన్న సంగతి తెలిసిందే. మొదటిభాగంలోని పాత్రల్నే కంటిన్యూ చేస్తూ డిఫరెంట్ కథాంశంతో సినిమాని రూపొందిస్తున్నారు.  సునీల్ పాత్ర అదనంగా చేరింది.

కరోనా కారణంగా పలు మార్లు విడుదల తేదీని వాయిదా వేసుకున్న ఈ సినిమాని సమ్మర్ కానుకగా ఈ ఏడాది ఏప్రిల్ 28న విడుదల చేయాలని నిర్ణయించుకున్నారు. అయితే ఏప్రిల్ 29న మెగాస్టార్ చిరంజీవి ‘ఆచార్య’ విడుదలవుతుండడంతో ‘ఎఫ్ 3’ చిత్రానికి మరో కొత్త డేట్ ను మేకర్స్ ట్విట్టర్ వేదికగా ప్రకటించారు.  సినిమాను మే 27న విడుదల చేయబోతున్నారు.

ఇక ఈ తేదీలో ఎలాంటి మార్పులు ఉండబోవని నిర్మాతలు కన్ఫర్మ్ చేశారు. ‘పిల్లలు పరీక్షలు ముగించుకోండి.. పెద్దలు సమ్మర్ సందడికై తయారుకండి.’ అంటూ ఈ ఫన్ పిక్నిక్ డేట్‌ను కన్ఫర్మ్ చేశారు. మొదటి భాగం అద్భుతమైన విజయం సొంతం చేసుకోవడంతో.. రెండో భాగంపై భారీ అంచనాలు నెలకొన్నాయి. డబ్బు చుట్టూ తిరిగే కథాంశంతో ఈ సారి తోడు దొంగల్లాంటి తోడల్లుళ్ళు .. నవ్వులు పూయించబోతున్నారు. రేచీకటితో వెంకీ, నత్తి తో వరుణ్ తేజ్ అభిమానులకి హిలేరియస్ ఎంటర్‌టైన్ మెంట్ ఇవ్వబోతున్నారు.