పంజాబ్ సీఎం కాంగ్రెస్ అభ్యర్థి అతడేనా..?

పంజాబ్ శాసన సభ ఎన్నికల సందర్భంగా ముఖ్యమంత్రి అభ్యర్థి ఎవరనే అంశంపై సస్పెన్స్‌కు కాంగ్రెస్  త్వరలో తెర దించబోతున్నట్లు తెలిసింది. ప్రస్తుత ముఖ్యమంత్రి చరణ్‌జిత్ సింగ్ చన్నీ, పీసీసీ చీఫ్ నవజోత్ సింగ్ సిద్ధూలలో ఒకరిని ముఖ్యమంత్రి అభ్యర్థిగా ఆ పార్టీ నేత రాహుల్ గాంధీ ఈ నెల 6న ప్రకటిస్తారని సమాచారం.

పంజాబ్ శాసన సభ ఎన్నికలు ఈ నెల 20న జరుగుతాయి. ఆదివారంనాడు (ఈ నెల 6న) రాహుల్ గాంధీ పంజాబ్‌లో పర్యటిస్తారు. ఈ ఎన్నికల్లో పార్టీ తరపున ముఖ్యమంత్రి అభ్యర్థిని ముందుగానే ప్రకటిస్తామని జనవరి 27న రాహుల్ పంజాబ్‌లో పర్యటించినపుడు చెప్పారు.

పార్టీ కార్యకర్తలను సంప్రదించిన తర్వాత ఓ నిర్ణయం తీసుకుంటామన్నారు. తమలో ఎవరిని ముఖ్యమంత్రి అభ్యర్థిగా ప్రకటించినప్పటికీ సహకరిస్తామని సిద్ధూ, చన్నీ హామీ ఇచ్చారని తెలిపారు. సీఎం అభ్యర్థిని ప్రకటించాలని సిద్ధూ డిమాండ్ చేసిన నేపథ్యంలో రాహుల్ గాంధీ ఈ విధంగా స్పందించారు. ఇదిలావుండగా, కాంగ్రెస్ అధ్యక్షురాలు సోనియా గాంధీ ఆ పార్టీ నేతలు, కార్యకర్తలతో సంప్రదింపులు జరుపుతున్నట్లు తెలిసింది. శక్తి యాప్ ద్వారా తమ అభిప్రాయాలను తెలియజేయాలని ఆమె కోరినట్లు సమాచారం.