టీఆర్ఎస్ అంటే తిరుగులేని రాజకీయ శక్తి

తెలంగాణ రాష్ట్రంలో ఈ రోజు విడుదలైన స్థానిక సంస్థల ఎమ్మెల్సీ ఎన్నికల్లో ఆరుకు ఆరు స్థానాలను అధికార టీఆర్ఎస్ కైవసం చేసుకుంది. దీనిపై స్పందించిన మంత్రి కొప్పుల ఈశ్వర్ మాట్లాడుతూ టీఆర్ఎస్ అంటే తిరుగులేని రాజకీయ శక్తి అని మరోసారి నిరూపితమైందని అన్నారు.

స్థానిక సంస్థల కోటా నుంచి శాసనమండలిలోని 12 స్థానాలకు జరిగిన ఎన్నికలలో నూటికి నూరు శాతం టీఆర్ఎస్ గెల్చుకోవడం సంతోషంగా ఉందన్నారు. ఈ ఎన్నికలలో ఎమ్మెల్సీలుగా ఘన విజయం సాధించిన భానుప్రసాదరావు, రమణ, విఠల్, యాదవరెడ్డి, కోటిరెడ్డి, మధులకు హృదయపూర్వక శుభాకాంక్షలు తెలిపారు.

ఉమ్మడి కరీంనగర్ జిల్లా యావత్‌ ప్రజానీకం సీఎం కేసీఆర్‌ వెంటే ఉన్నారని మరోసారి రుజువైందన్నారు. ఈ ఎన్నికలలో టీఆర్ఎస్ అభ్యర్థులకు సంపూర్ణ మద్దతు తెలిపిన, ఓటేసిన ప్రజాప్రతినిధులకు, సహకరించిన పార్టీ ప్రముఖులకు,నాయకులకు, శ్రేణులకు హృదయ పూర్వక కృతజ్ఞతలు తెలిపారు.