ప్రశాంత్‌ కిషోర్‌ సంచలన నిర్ణయం

రాజకీయ వ్యూహకర్త ప్రశాంత్‌ కిషోర్‌, పంజాబ్‌ సీఎం ముఖ్య సలహాదారు పదవికి రాజీనామా చేశారు. వచ్చే ఏడాది జరుగనున్న పంజాబ్‌ అసెంబ్లీ ఎన్నికల్లో తన ప్రమేయం ఏమీ ఉండదని తెలిపారు. ప్రజా జీవితం నుంచి తాత్కాలికంగా విరామం తీసుకుంటున్నట్లు చెప్పారు. ఈ మేరకు పంజాబ్‌ సీఎం అమరీందర్‌ సింగ్‌కు ఆయన లేఖ రాశారు. ‘ప్రజా జీవితంలో క్రియాశీల పాత్ర నుండి నేను తాత్కాలిక విరామం తీసుకోవాలనుకుంటున్న సంగతి మీకు తెలిసిందే.

నా ఈ నిర్ణయాన్ని దృష్టిలో ఉంచుకుని, మీ ప్రిన్సిపల్ సలహాదారుగా నేను బాధ్యతలు చేపట్టలేకపోయాను. నా భవిష్యత్తు కార్యాచరణపై నేను ఇంకా ఎలాంటి నిర్ణయం తీసుకోలేదు. ఈ నేపథ్యంలో ఈ బాధ్యతల నుండి నన్ను విముక్తి చేయమని మిమ్మల్ని అభ్యర్థిస్తూ ఈ లేఖ రాస్తున్నాను’ అని ప్రశాంత్‌ కిషోర్‌ అందులో పేర్కొన్నారు.

పంజాబ్‌ కాంగ్రెస్‌లో ఓ వైపు అంతర్గత పోరు, మరోవైపు అసెంబ్లీ ఎన్నికలు సమీపిస్తున్న తరుణంలో రాజకీయ వ్యూహకర్త ప్రశాంత్‌ కిషోర్‌ తీసుకున్న ఈ నిర్ణయం సీఎం అమరీందర్‌ సింగ్‌ను నిరాశపర్చింది. ఈ ఏడాది మార్చిలో ప్రశాంత్‌ కిషోర్‌ను తన ప్రిన్సిపల్‌ సలహాదారుగా అమరీందర్‌ సింగ్‌ నియమించారు. ఆయనకు కేబినెట్‌ హాదా కూడా కల్పించారు. అయితే ప్రశాంత్‌ కిషోర్‌ ఆ బాధ్యతలను చేపట్టలేదని తెలుస్తున్నది.