సీఎం కేసిఆర్ నమ్మకాన్ని నిలబెట్టే విధంగా పనిచేద్దాం

తెలంగాణ రాష్ట్ర ముఖ్యమంత్రి కేసిఆర్ మానస పుత్రిక గురుకుల విద్యను ఆయన నమ్మకాన్ని నిలబెట్టే విధంగా మరింత బలోపేతం చేయాలని రాష్ట్ర గిరిజన సంక్షేమ, స్త్రీ-శిశు సంక్షేమ శాఖ మంత్రి శ్రీమతి సత్యవతి రాథోడ్ అధికారులకు సూచించారు. మంగళవారం దామోదర సంజీవయ్య సంక్షేమ భవన్ లో గిరిజన సంక్షేమ శాఖ కార్యదర్శి బెన్హర్ మహేశ్ దత్ ఎక్కా, ఎస్సీ, ఎస్టీ గురుకులాల కార్యదర్శి డాక్టర్ ఆర్.ఎస్ ప్రవీణ్ కుమార్, గిరిజన సంక్షేమ శాఖ కమిషనర్ క్రిస్టినా జడ్ చోంగ్తు, చీఫ్ ఇంజనీర్ శంకర్ రావు, ఇతర అధికారులతో మంత్రి శ్రీమతి సత్యవతి రాథోడ్ గారు సమీక్ష చేశారు.గురుకులాలకు వచ్చే విద్యార్థులకు కచ్చితంగా మంచి భవిష్యత్ అందే విధంగా ముఖ్యమంత్రి కేసిఆర్ గారు మన గురుకులాలను పటిష్టం చేసేందుకు అడిగిన వసతులన్నీ కల్పిస్తున్నారని, ఆయన నమ్మకాన్ని నిలబెట్టే విధంగా మన విద్యా విధానం కూడా అదే స్థాయిలో ఉండేటట్లు నిరంతర పర్యవేక్షణ చేయాలని సూచించారు.

పరీక్షలు సమీపిస్తున్న సందర్భంగా ప్రత్యేక క్లాసులు నిర్వహించడంతో పాటు సిబ్బంది, అధికారులను జవాబుదారితనం చేసే విధంగా స్పెషల్ డ్రైవ్ నిర్వహించాలని అధికారులను ఆదేశించారు. పరీక్షల అనంతరం ఇచ్చే సెలవుల ముందు విధిగా పేరేంట్, టీచర్స్ మీటింగ్ ఏర్పాటు చేయాలని సూచించారు. ఈ మీటింగుల్లో సెలవుల సమయంలో ఇంటి వద్ద విద్యార్థులు ఏమి చేస్తున్నారు, వారి ప్రవర్తన వంటి అంశాలపై తల్లిదండ్రులు నిఘా ఉంచేలా కౌన్సిలింగ్ ఇవ్వాలని చెప్పారు. చలికాలంలో విద్యార్థులకు వేడినీళ్లు ఇచ్చేందుకు సోలార్ పానెళ్లు ప్రభుత్వం మంజూరు చేసిందని, దీనివల్ల విద్యార్థులకు స్నానానికి వేడినీళ్ల వసతి అందడమే కాకుండా, ఈ సోలార్ ప్యానెళ్ల వల్ల దాదాపు ఒక్కో గురుకులానికి నెలకు లక్ష రూపాయల మేర కరెంటు బిల్లులు కూడా మిగులే అవకాశం ఉందని అధికారులు తెలిపారు.గురుకులాల్లో ప్రత్యేక డ్రైవ్ లు పెట్టి అక్కడి సమస్యలు తెలుసుకోవడంతో పాటు వాటిని పరిష్కరించేందుకు కూడా వెంటనే కృషి చేస్తామని చెప్పారు.