హ్యాట్రిక్ పై కన్నేసిన బాలయ్య బోయపాటి..!

నటసింహ నందమూరి బాలకృష్ణ-బోయపాటి శ్రీను కాంబినేషన్ మూవీ NBK 106 ఈ శుక్రవారం ప్రారంభమైన సంగతి తెలిసిందే. సింహా- లెజెండ్ తర్వాత ముచ్చటగా మూడవసారి ఈ కాంబో సెట్స్ పైకి రానున్నది. బాలయ్యకు హ్యాట్రిక్ ఇవ్వడమే ధ్యేయంగా బోయపాటి మాంచి మాస్ మసాలా యాక్షన్ కథాంశాన్ని రెడీ చేశారని తెలుస్తోంది. ప్రస్తుతం సెట్స్ పై ఉన్న రూలర్ చిత్రీకరణ ముగించి బోయపాటితో షూటింగ్ ను శర వేగంగా పూర్తిచేయాలని బాలయ్య భావిస్తున్నారట.

ఇక ఎన్బీకే 106 కోసం బోయపాటి ఎలాంటి కథాంశాన్ని ఎంచుకున్నారు? అంటే.. ఈసారి స్క్రిప్టు సామాజిక న్యాయం.. ఎమోషన్ .. ఎంటర్ టైన్ మెంట్ అంశాలకు పెద్దపీట వేసినట్లు తెలుస్తుంది. ఇక బాలయ్య క్యారెక్టరైజేషన్ ఎలా ఉంటుంది? అంటే.. మరోసారి పవర్ ఫుల్ పాత్ర లో కనిపించనున్నారని ఆవేశ పరుడైన జెంటిల్మన్ గా కనిపిస్తాడని తెలుస్తోంది. ఇక బోయపాటి గత సినిమాల్లో మహిళల ఔన్నత్యానికి పెద్ద పీట వేశారు. బోయపాటి సక్సెస్ పాయింట్ కూడా అదే. అలాంటి అంశం ఈ సినిమాలో కూడా కామన్ గా ఉంటుందట. అంతేకాదు మరో ఆసక్తికర విషయం ఏమిటంటే దేశ వ్యాప్తంగా సంచలనం సృష్టించిన దిశ ఘటనను బోయపాటి తన సినిమాలో చూపిస్తారని ప్రచారమవుతోంది. ప్రస్తుతం దేశంలోనే చర్చనీయాంశంగా నిలించిన అంశం కాబట్టి ఇలాంటి పాయింట్ తీసుకుంటే సినిమా ప్రేక్షకులను ఆకర్షిస్తుందని భావిస్తున్నారు. ఇక బాలయ్య బోయపాటి ల హ్యాట్రిక్ మంత్రం ఏస్థాయిలో విజయవంతం అవుతుందో వేచిచూడాలి.