మాజీ ఎమ్మెల్యే కొడుకుపై సినీనటి సంజన పిర్యాదు

తెలంగాణ రాష్ట్ర రాజధాని మహానగరం హైదరాబాద్ పరిధిలో మాదాపూర్‌లోని ఒక పబ్‌లో పటాన్‌చెరు నియోజకవర్గానికి చెందిన మాజీ ఎమ్మెల్యే నందీశ్వర్‌గౌడ్‌ కుమారుడు ఆశీష్‌ గౌడ్‌ వీరంగం సృష్టించాడు. మద్యం మత్తులో యువతులపై ఆశిష్‌ గౌడ్‌ దాడి చేసినట్లు మాదాపూర్‌ పీఎస్‌లో సినీనటి, బిగ్‌బాస్‌ ఫేమ్‌, సంజన ఫిర్యాదు చేసింది.

ఆశిష్‌గౌడ్‌ తమతో అసభ్యకరంగా ప్రవర్తించాడని, బూతులు తిట్టాడని ఆమె ఫిర్యాదులో పేర్కొంది. మద్యం మత్తులో ఆశిష్‌ గౌడ్‌ యువతులను చితకబాదినట్లు తెలిసింది.

అడ్డుకున్నవారిపై కూడా ఆశీష్‌ గౌడ్‌తో పాటు ఆయన స్నేహితులు దాడి చేసినట్లు బాధిత అమ్మాయిలు ఫిర్యాదు చేశారు. పబ్‌లో లోపల, బయట ఉన్న సీసీటీవీ ఫుటేజీలను పోలీసులు పరిశీలించనున్నారు. ఆశిష్‌ గౌడ్‌పై క్రైమ్‌నంబర్‌ 948/2019 కింద కేసు నమోదు చేశారు. సెక్షన్‌ 354, 354ఏ, 509 కింద కేసు నమోదు చేసి దర్యాప్తు ప్రారంభించారు.