వరంగల్‌లో శ్రీ స్వాత్మానందేంద్ర సరస్వతి స్వామి వారి ధర్మ ప్రచార యాత్ర ప్రారంభం…!

ఉమ్మడి వరంగల్ జిల్లాలో విశాఖ శ్రీ శారదాపీఠం ఉత్తరాధికారి శ్రీ శ్రీ శ్రీ స్వాత్మానందేంద్ర సరస్వతి స్వామి వారి ధర్మ ప్రచార యాత్ర ప్రారంభం అయింది. ఇవాళ వరంగల్ నగరంలోని రాజ్యసభ సభ్యులు కెప్టెన్ లక్ష్మీకాంత రావు గారి స్వగృహంలో భక్తులకు స్వామివారు దర్శనం ఇవ్వడం జరిగింది. ఈ సందర్భంగా టీఆర్ఎస్ పశ్చిమ ఎమ్మెల్యే వినయ్ భాస్కర్‌తోపాటు, పలువురు ప్రముఖలు స్వామివారిని సందర్శించుకుని ఆశీస్సులు పొందారు. ఓరుగల్లు పర్యటనలో భాగంగా అక్టోబర్ 8 వరకు శ్రీ స్వాత్మానందేంద్ర స్వామి పలు దేవాలయాలను సందర్శిస్తారు. అలాగే కెప్టెన్ లక్ష్మీ కాంత రావు నివాసంలో దేవి నవరాత్రుల కార్యక్రమంలో పాల్గొంటారు. ఈ మేరకు ఇవాళ కెప్టెన్ లక్ష్మీకాంతరావు గారి నివాసంలో స్వయంగా స్వాత్మానంద్ర స్వామి వారు దేవి పీఠ పూజ కార్యక్రమాన్ని నిర్వహించారు.

 విశాఖ శ్రీ శారదాపీఠం ఉత్తరాధిరిగా బాధ్యతలు చేపట్టిన తర్వాత తొలిసారి తెలంగాణ ధర్మ ప్రచార యాత్ర చేపట్టిన శ్రీ స్వాత్మానందేంద్ర సరస్వతి స్వామి వారికి వరంగల్ విశాఖ శారదాపీఠం భక్తులు ఘన స్వాగతం పలికారు. నగరమంతటా స్వామివారికి ఆహ్వానం పలుకుతూ..పెద్ద ఎత్తున ఫ్లెక్సీలు, హోర్డింగులు పెట్టారు. స్వామివారి ఆగమనంతో వరంగల్‌‌లో ఆధ్యాత్మిక శోభ సంతరించుకుంది. ఇక నిన్న చెన్నైలో పీఠాధిపతి శ్రీ స్వరూపానందేంద్ర సరస్వతి మహాస్వామితో కలిసి తిరుపతి తిరుక్కుడై ఉత్సవంలో పాల్గొని..ధర్మ ప్రచార యాత్ర నిమిత్తం హైదరాబాద్‌కు చేరుకున్న శ్రీ స్వాత్మానందేంద్ర సరస్వతి స్వామి వారికి దరువు ఎండీ కరణ్ రెడ్డి తదితర భక్తులు ఘనస్వాగతం పలికారు.