మీకు ఫ్రీ సినిమా టికెట్లు కావాలా..ట్రాఫిక్ పోలీసుల‌ను క‌ల‌వండి

ట్రాఫిక్ పోలీసులు ఏంటి..సినిమా టికెట్లు ఏంటి..మ‌న‌కు ఇవ్వ‌డం ఏంట‌ని ఆశ్చ‌ర్య‌పోతున్నారా?  నిజంగా నిజ‌మండి. ట్రాఫిక్ పోలీసులే సామాన్యుల‌కు సినిమా టికెట్లు ఇస్తున్నారు.  ట్రాఫిక్ నిబంధనలు పాటిస్తూ బండ్లు నడుపుతున్నవారిని ప్రోత్సహించ‌డంలో భాగంగా సినిమా టికెట్లను గిఫ్టులుగా ఇస్తూ పోలీసులు సర్ ప్రైజ్ చేస్తున్నారు.

పంజాగుట్టలో ఎప్ప‌ట్లాగే మంగళవారం అడుగడుగునా ట్రాఫిక్ పోలీసులు వాహనాలను తనిఖీలు చేస్తూ కనిపించారు. కూడళ్లలో టూ వీలర్లను, వాహనాలను ఆపి… నంబర్ల ఆధారంగా వాటిపై చలాన్లు చెక్ చేశారు. ఎటువంటి చలాన్లు లేని వాహనాలను గుర్తించి.. వాటిని నడుపుతున్నవారిని ప్రత్యేకంగా అభినందించారు. వారికి అక్కడికక్కడే సినిమా టికెట్లు బహుమతిగా అందజేశారు. మీలాగే మీ తోటివారికి కూడా పద్ధతిగా వాహనాలు నడిపేలా జాగ్రత్తలు తీసుకోండి పన్నులు, చలాన్లు తగ్గించుకునేలా చూడండి అని  పోలీసులు విజ్ఞప్తిచేశారు.

ఇలా 30 మంది వాహన యజమానులకు సినిమా టికెట్లు ఇచ్చామని పోలీసులు వివ‌రించారు. తనిఖీల్లో  ఎటువంటి చలాన్లు పడనివారికి సినిమా టికెట్లు గిఫ్టుగా ఇస్తే.. వారికి ప్రోత్సాహం ఇచ్చినట్టుగా ఉంటుందని ఈ డ్రైవ్ నిర్వహించామని ట్రాఫిక్ పోలీసులు వివ‌రించారు.