కేటీఆర్‌ బర్త్‌ డే.. గిఫ్ట్ ఎ స్మైల్ చాలెంజ్ సక్సెస్..!!

మాజీ మంత్రి, యువనేత టీఆర్‌ఎస్ పార్టీ వర్కింగ్ ప్రెసిడెంట్ కేటీఆర్‌ జన్మదిన వేడుకలు బుధవారం రాష్ట్ర వ్యాప్తంగా ఘనంగా జరిగాయి. కేటీఆర్ జన్మదినాన్ని పురస్కరించుకొని తమ చుట్టుపక్కల ఉన్న వారికి ఎంతోకొంత సహాయ పడాలనే సదుద్దేశ్యంతో ప్రారంభమైన గిఫ్ట్ ఎ స్మైల్ చాలెంజ్ సూపర్ సక్సెస్ అయింది. కేటీఆర్ పుట్టినరోజు సందర్భంగా ప్రారంభించిన గిఫ్ట్ ఎ స్మైల్ కార్యక్రమంలో పలువురు ప్రముఖులతో పాటు సాధారణ పార్టీ కార్యకర్తలు, కేటీఆర్ అభిమానులు పాల్గొన్నారు. ఇందులో భాగంగా తమ చుట్టుపక్కల ఉన్న వృద్ధాశ్రమాలు,పాఠశాలలు మరియు ఇతర మార్గాల్లో ఎంతో కొంత సహాయం అందిస్తూ కేటీఆర్‌కి జన్మదిన శుభాకాంక్షలు తెలిపారు.

గత రెండు రోజుల కింద తన పుట్టిన రోజు సందర్భంగా ప్రకటనలు, హోర్డింగులు, పూలబోకేలు, కేకులపైన కాకుండా ఈ గిఫ్ట్ ఎ స్మైల్ కార్యక్రమంలో పాల్గొనాలని కేటీఆర్‌ పిలుపునిచ్చారు. దీంతో గిఫ్ట్ ఎ స్మైల్ హ్యష్ ట్యాగ్‌తో ట్విట్టర్‌లో ఊపందుకుంది. గిఫ్ట్ ఎ స్మైల్ హ్యష్ ట్యాగ్ ఉపయోగిస్తూ అనేక మంది ప్రముఖులు కేటీఆర్‌కు శుభాకాంక్షలు తెలిపారు. హైదరాబాద్‌లోని అమెరికా కాన్సుల్ జనరల్ కేథరిన్ హడ్డా నగరంలోని ఒక సేవా సంస్ధకు తన సొంత నిధుల నుంచి డొనేషన్ ఇచ్చి, తమ ప్రియమిత్రుడు కేటీఆర్‌కు శుభాకాంక్షలు అంటూ పుట్టినరోజు శుభాకాంక్షలు తెలిపారు. ఈ క్రమంలోనే తన పుట్టిన రోజు సందర్భంగా గిఫ్ట్ ఎ స్మైల్ కార్యక్రమంలో భాగస్వాములై సేవా కార్యక్రమాల్లో పాల్గొన్న వారందరికీ, తనకు పుట్టిన రోజు శుభాకాంక్షలు తెలియజేసిన నాయకులు, కార్యకర్తలు, అభిమానులకు కేటీఆర్ కృతజ్ఞతలు తెలిపారు.