మూడు వందల కోట్లతో నిజామాబాద్ నగరాభివృద్ధి

నిజామాబాదు లో రూ 300 కోట్లతో పలు అభివృద్ధి కార్యక్రమాలు నిర్వహిస్తున్నామని రాష్ట్ర రహదారులు మరియు భవనములు, శాసనసభ వ్యవహారాల శాఖామాత్యులు వేముల ప్రశాంత్ రెడ్డి అన్నారు.బుధవారం నాడు రు. 246 కోట్ల రూపాయలతో పూర్తి చేసిన భూగర్భ డ్రైనేజీ శుద్ధి ప్లాంట్ ను ఆయన ప్రారంభించారు. అనంతరం ఏర్పాటుచేసిన కార్యక్రమంలో ముఖ్యఅతిథిగా మాట్లాడుతూ, నలభై సంవత్సరాలుగా జరగని ఎస్ టి పి కార్యక్రమాన్ని తాము పూర్తి చేశామని దీని వెనుక ఎంతో కృషి, పట్టుదల ఉందన్నారు. స్థానిక శాసనసభ్యులు గణేష్ గుప్తా, ఇంజనీర్లు, అధికారుల శ్రమ ఉందన్నారు. ఇంత పెద్ద మొత్తంలో నిధులు మంజూరు చేసినందుకు ముఖ్యమంత్రి కేసీఆర్ కు ధన్యవాదాలు తెలుపుతున్నానన్నారు. ఈ ప్రక్రియను ఓపెన్ ఏరియేషన్ సిస్టం సాంకేతికతతో అనుసంధానం చేసినందున 88 ఎకరాల కు బదులు కేవలం 18 ఎకరాల్లోనే ఈ పూర్తి పనులు నిర్వహించడం జరిగిందన్నారు. తద్వారా 70 ఎకరాల స్థలం ఆదా అయిందని, ఈ స్థలంలో టూ బిహెచ్ కే , కలెక్టరేట్, ఐటి hub, పార్కు లు ఏర్పాటు చేస్తున్నామని ఆయన తెలిపారు. నిజామాబాద్ నగరం లో 125 కోట్ల రూపాయలతో రహదారులు ఏర్పాటు చేస్తున్నామని ఇప్పటికే 50 కోట్ల రూపాయల విలువైన రహదారులు పూర్తిచేశామని మరో 75 కోట్ల రూపాయల పనులు నిర్వహిస్తున్నామన్నారు. నగరంలో డ్రైనేజీ, రోడ్లు, డ్రింకింగ్ వాటర్, స్ట్రీట్ లైట్ లు తదితర కార్యక్రమాలతో నగరాన్ని సుందరంగా తీర్చిదిద్దుతున్నామని ఆయన తెలిపారు. మిషన్ భగీరథ ద్వారా పోచంపాడు, అలీసాగర్ నుండి నిజామాబాద్ పట్టణానికి త్రాగు నీరు వస్తుందని ఆయన తెలిపారు. అంతకుముందు ఆయన మొక్కలు నాటి నీరు పోశారు.