వైసీపీకి పీవీపీ.. నాగార్జున ప్రచారం చేసే అవకాశం

ఏపీ ఎన్నికకు మరికొద్దిరోజులే గడువుండడంతో పార్టీల హడావిడి స్పష్టంగా కనిపిస్తోంది. ముఖ్యంగా ఈ ఎన్నిక‌ల‌లో సినీ నటుల, సినీ ప్రముఖుల హ‌వా ఎక్కువ‌గా క‌నిపిస్తోంది. భారీగా సినీనటులు వైసీపీలో చేరడంతో సినీ గ్లామ‌ర్ వైసీపీకి ప్ల‌స్ కాబోతోంది. తాజాగా చేరిన అలీ, ఇప్పటికే ఉన్న 30 ఇయర్స్ ఫృథ్వీ, పోసాని కృష్ణ‌ముర‌ళి, జయసుధలు వైసీపీలో చేరగా ఇప్పటికే చాలామంది జగన్ మద్దతిస్తున్నారు. ఈ క్రమంలో ప్ర‌ముఖ నిత ప్ర‌సాద్ వీ పొట్లూరి (పీవీపీ) కూడా వైసీపీలో చేరనున్నట్టు తెలుస్తోంది. పీవీపీ చాలాకాలం నుంచి ప్ర‌త్య‌క్ష రాజ‌కీయాల్లోకి రావాలని ప్రయత్నిస్తున్నారు.

గతంలో ఆయన టీడీపీలో చేరనున్నారనే వార్త‌లొచ్చాయి. కానీ పీవీపీ ఎట్టకేలకు వైసీపీలోనే చేరుతున్నారు. విజ‌య‌వాడ నుంచి ఆయ‌న పార్ల‌మెంట్‌కి పోటీ చేయ‌నున్నారని తెలుస్తోంది. అలాగే పీవీపీకి అధికార తెలుగుదేశం పార్టీ నుంచి గ‌ట్టి పోటీ ఎదురుకానుంది. అయితే పీవీపీకి జిల్లాలో బ‌ల‌మైన కమ్మ సామాజిక వ‌ర్గం అండ‌దండ‌లున్నాయి. వ్యాపార వేత్త కాబ‌ట్టి ఆర్థికంగానూ ఈయన స‌మ‌ర్థుడే. ఈసారి విజ‌య‌వాడ ఎంపీ స్థానానికి ఆయ‌న గ‌ట్టి పోటీ ఇవ్వ‌బోతున్న‌ట్టు తెలుస్తోంది. పీవీపీకి నాగార్జున కూడా మంచి మిత్రుడు కావడంతో వైసీపీతో ఇప్పటికే సత్సంబంధాలు కలిగిఉన్న నాగార్జున పీవీపీ తరపున కానీ వైసీపీ తరపున కానీ ప్రచారం చేసే అవకాశాలు కనిపిస్తున్నాయి.