ఏవీ సుబ్బారెడ్డికి నా తరుపున ఉన్న ఓట్లన్నీ వేయిస్తా ఎస్పీవై రెడ్డి…మరి అఖిలప్రియ

కర్నూలు జిల్లా టీడీపీలో రాజకీయాలు రసవత్తరంగా మారుతున్నాయి. జిల్లాకు చెందిన నంద్యాల ఎంపీ ఎస్పీవై రెడ్డి కీల‌క ప్ర‌క‌ట‌న చేశారు. మంత్రి భూమా అఖిలప్రియ, టీడీపీ నేత ఏవీ సుబ్బారెడ్డి మధ్య మరోసారి కర్నూల్ జిల్లాలో కలకలం చోటుచేసుకునే ఎపిసోడ్ మొదలైంది. సుబ్బారెడ్డికి ఎంపీ ఎస్పీవై రెడ్డి తోడు కావడంతో…అఖిలప్రియ దారి ఎటు వైపో మరి. నంద్యాలలో ఎంపీ ఎస్పీవై రెడ్డితో కలిసి టీడీపీ పార్టీ కార్యాలయాన్ని ప్రారంభించిన ఏవీ సుబ్బారెడ్డి నంద్యాల టికెట్ పై హాట్ కామెంట్స్ చేశారు. గత ఎన్నికల్లో భూమా నాగిరెడ్డి కోసం నంద్యాల టికెట్ త్యాగం చేశాను.. ఇప్పుడు నేను నంద్యాల టికెట్ అశించటం తప్పా? అని ప్రశ్నించారు. “భూమా కుటుంబానికి ఒకే టికెట్ ఉంటే నేను టికెట్ అడిగే వాడిని కాదు.. కానీ వారికి రెండు టికెట్లు ఇచ్చారని ఆయన.. భూమా కుటుంబం ఒకే టికెట్ అశిస్తే హుందాగా ఉంటుంది. అయితే నాపై రాళ్ల దాడి చేసిన వారికి సంస్కరం ఉంటుందని అనుకోవటం లేదు` అంటూ ఏవీ సుబ్బారెడ్డి ఘాటు వ్యాఖ్యలు చేశారు. ముఖ్యమంత్రి చంద్రబాబు నన్ను నమ్మారు.. నేను చంద్రబాబును నమ్మా.. సీటు నాకే వస్తుందన్న నమ్మకం ఉందన్నారు. అన్ని పార్టీల్లో తనకు అభిమానులున్నారని… టిక్కెట్ తెచ్చుకుంటే గెలిపిస్తామంటున్నారని సుబ్బారెడ్డి వెల్లడించారు. ఎంపీ ఎస్పీవై రెడ్డి ఇదే సందర్భంలో సుబ్బారెడ్డికి మద్దతుగా మాట్లాడరు. నంద్యాల అసెంబ్లీ టికెట్ విషయంలో ముఖ్యమంత్రి చంద్రబాబు నాయుడు అడిగితే ఏవీ సుబ్బారెడ్డికే ఇవ్వాలని చెబుతానన్నారు. “ఏవీ సుబ్బారెడ్డి భూమా అనుచరుడు మాత్రమే అనుకున్నా.. కానీ చాలా శక్తివంతుడని అర్థమవుతోంది. రాబోయే ఎన్నికల్లో ఏవీ సుబ్బారెడ్డికి నా తరుపున ఉన్న ఓట్లన్నీ వేయిస్తా. నంద్యాలలో టికెట్ ఏవీకి ఇస్తే గెలుపు ఖాయం` అనే నమ్మకాన్ని ఎస్పీవై రెడ్డి వ్యక్తం చేశారు. ఈ ఇద్దరు ముఖ్యనేతలు ఒక్కటవటంతో అఖిలప్రియకు ఇంకా నో టిక్కెట్ అంటున్నారు సీనియర్ రాజకీయ నేతలు.