కేటీఆర్‌ చేతుల మీదుగా చరణ్ మూవీ ట్రైలర్…!

టీఆర్‌ఎస్ కార్యనిర్వాహక అద్యక్షుడు కేటీఆర్ మరోసారి నటుడు రాంచరణ్‌తో వేదిక పంచుకోనున్నారు. మెగా ఫ్యామిలీ హీరో నటించిన ‘వినయ విధేయ రామ’ ట్రైలర్‌ను కేటీఆర్‌ చేతుల మీదుగా విడుదల చేయనున్న విషయాన్ని చిత్ర బృందం ఇటీవల ప్రకటించింది. గురువారం యూసఫ్‌గూడలోని పోలీస్‌ గ్రౌండ్స్‌లో ఈ సినిమా ప్రీరిలీజ్‌ కార్యక్రమాన్ని నిర్వహించనున్నారు. ఈ వేడుకకు మెగాస్టార్‌ చిరంజీవి ముఖ్య అతిథిగా విచ్చేయనున్నారు. ఇదే కార్యక్రమంలో కేటీఆర్ ట్రైలర్‌ను విడుదల చేస్తారు.

డీవీవీ ఎంటర్‌టైన్‌మెంట్స్‌ బ్యానర్‌పై దానయ్య నిర్మాతగా వ్యవహరిస్తున్నారు. బాలీవుడ్‌ నటుడు వివేక్‌ ఒబెరాయ్‌ ప్రతినాయకుడి పాత్రలో నటించారు. ప్రశాంత్‌, ఆర్యన్‌ రాజేశ్‌, స్నేహ తదితరులు కీలక పాత్రలు పోషించారు. ఇటీవల విడుదలైన రెండు పాటలు, టీజర్‌కు మంచి స్పందన లభించింది. దేవిశ్రీ ప్రసాద్‌ సంగీతం అందించిన ఈ చిత్రాన్ని సంక్రాంతి కానుకగా ప్రేక్షకుల ముందుకు తీసుకురానున్నారు.