సూపర్ స్టార్ కృష్ణ వైఎస్ జగన్ పై చేసిన వ్యాఖ్యలకు..గల్లా జయదేవ్ షాక్

సూప‌ర్ స్టార్ కృష్ణ‌, దివంగ‌త ముఖ్య‌మంత్రి వైఎస్ రాజ‌శేఖ‌ర్‌రెడ్డి ఇద్ద‌రూ మంచి మిత్రుల‌న్న విష‌యం తెలిసిందే. ఈ క్ర‌మంలో గురువారం త‌న పుట్టిన రోజు సంద‌ర్భంగా ప‌లు మీడియా ఛానెళ్ల‌కు ఇచ్చిన ఇంట‌ర్వ్యూల్లో సూప‌ర్ స్టార్ కృష్ణ మాట్లాడుతూ.. ప‌లు ఆస‌క్తిక‌ర వ్యాఖ్య‌లు చేశారు. కృష్ణ చేసిన వ్యాఖ్యలు ఇప్పుడు ఏపీలోని అధికారంలో ఉన్న తెలుగుదేశం పార్టీలో ప్రకంపనలు సృష్టిస్తున్నాయి. మరీ ముఖ్యమంగా మహేష్ బాబు బావ అయిన గల్లా జయదేవ్‌కు ఇది మరీ షాకింగే.

ఎందుకంటే వైఎస్ జగన్ వచ్చే 2019 ఎన్నికల్లో ఘన విజయం సాధించి ముఖ్యమంత్రి అవుతారని ఆయన వ్యాఖ్యానించడమే. వైఎస్ రాజ‌శేఖ‌ర్‌రెడ్డి, తాను ఎంపీగా ఉన్న స‌మ‌యంలో పార్ల‌మెంట్‌లో చాలా సంద‌ర్భాల్లో ప్ర‌జా స‌మ‌స్య‌ల‌పై చ‌ర్చించామ‌న్నారు. ఒక మ‌నిషిని ప్రేమ‌గా చూడ‌టం.. ఇచ్చిన మాట‌కు క‌ట్టుబ‌డి ఉండ‌టం వైఎస్ఆర్‌కే సాధ్య‌మ‌న్నారు వైఎస్ జగన్ తలపెట్టిన ప్రజా సంకల్ప యాత్రకు జనం భారీగా తరలి వస్తున్నారనీ, ఇలాంటి స్పందనే వైఎస్ రాజశేఖర రెడ్డి చేసిన పాదయాత్రకు కూడా వచ్చిందని అన్నారు. జగన్ పాదయాత్ర చూస్తుంటే వైఎస్సార్ పాదయాత్రలా అనిపిస్తోందని అన్నారు. జగన్ లో కష్టపడే తత్వం, పట్టుదల వున్నాయనీ, అనుకున్నది సాధించే వరకూ విశ్రమించని నాయకుడు జగన్ అని పొగడ్తలు కురిపించారు. ఏదేమైనప్పటికీ సూపర్ స్టార్ కృష్ణ చేసిన వ్యాఖ్యలు ఇప్పుడు చర్చనీయాంశంగా మారాయి. మరోవైపు మహేష్ బాబుకు బావ అయిన గల్లా జయదేవ్ తెదేపా ఎంపీగా వున్నారు. మరి ఈ వ్యాఖ్యలపై ఆయన ఎలా స్పందిస్తారో చూడాలి.