కోదండరాం సభలో సీఎం కేసీఆర్ పై ప్రశంసలు..!

ప్రొఫెసర్ కోదండరాం సభలో సీఎం కేసీఆర్ పై సినీనటుడు, నిర్మాత ఆర్ నారాయణమూర్తి ప్రశంసల వర్షం కురిపించారు.తెలంగాణ రాష్ట్రంలో ఎన్నో సంస్కరణలు చేపట్టిన ముఖ్యమంత్రి కేసీఆర్ పాలన భేష్. ఆయనకు నా సెల్యూట్ అని ఆయన కొనియాడారు .రాష్ట్రంలోని వరంగల్ రూరల్ జిల్లా పరకాలలో నిన్న( ఆదివారం ) తెలంగాణ రైతు జేఏసీ ఆధ్వర్యంలో రైతు ప్రదర్శన, బహిరంగ సభ జరిగింది. ఈ సందర్భంగా ఆర్ నారాయణమూర్తి మాట్లాడుతూ.. దేశంలో ఎక్కడాలేని విధంగా తెలంగాణ రాష్ట్రంలో ప్రజల ఆకాంక్ష మేరకు సీఎం కేసీఆర్ పాలన సాగిస్తున్నారన్నారు. రైతులకు, తెలంగాణ ప్రాంత ప్రజలకు 24 గంటల కరంటును అందించడం, రూ.4వేల చొప్పున ఎకరాకు పెట్టుబడి అందించే ప్రక్రియకు శ్రీకారం చుట్టడం, నీటి సద్వినియోగానికి ప్రాజెక్టులు, నిర్మాణాలు చేపట్టడాన్ని స్వాగతిస్తున్నానని చెప్పారు. ఈ కార్యక్రమంలో ప్రొఫెసర్ కోదండరాం,జేఏసీ నాయకుడు రాజేశ్వర్‌రావు ,రైతులు  పాల్గొన్నారు.