ఈ వెబ్‌సైట్లో న‌మోదు చేసుకుంటే…తెలంగాణ నిరుద్యోగుల‌కు ఉపాధి రెడీ

తెలంగాణ‌లోని నిరుద్యోగుల కోసం మ‌రో నూత‌న అవ‌కాశాన్ని రాష్ట్ర ప్ర‌భుత్వం క‌ల్పించింది. ఇప్ప‌టికే ప‌లు ఉద్యోగాలు భ‌ర్తీ చేస్తున్న ప్ర‌భుత్వం మ‌రిన్ని ఉద్యోగ‌, ఉపాధి అవ‌కాశాలు క‌ల్పించేందుకు నూత‌న సేవ‌ల‌ను తీసుకువ‌చ్చింది. తెలంగాణ సచివాలయంలో ఈ మేర‌కు తాజాగా సైట్‌ను ప్రారంభించింది. నిరుద్యోగులు ఎక్కడనుండి అయిన వెబ్ పోర్టల్ ద్వారా రిజిస్ట్రేషన్ చేసుకునేందుకు వీలుగా www.employment.gov. in అనే వెబ్ సైట్ ను హోం, కార్మిక శాఖా మంత్రి నాయిని న‌ర్సింహారెడ్డి  తెలంగాణ సచివాలయంలో ప్రారంభించారు.

ఈ సంద‌ర్భంగా మంత్రి నాయిని మాట్లాడుతూ 9లక్షలకు పైగా మంది నిరుద్యోగులు ఎంప్లాయిమెంట్ కార్యాలయాల్లో రిజిస్ట్రేషన్ చేయించుకున్నారని వివ‌రించారు. ఈ వెబ్ సైట్ ద్వారా రిజిస్ట్రేషన్ చేసుకుంటే నిరుద్యోగులకు ఉపాధి అవకాశాలు కల్పిస్తామ‌ని తెలిపారు. టామ్ కామ్ ద్వారా రిజిస్ట్రేషన్ చేసుకుంటే విదేశాల్లో ఉపాధి చాన్స్ సంపాదించుకోవ‌చ్చున‌ని వివ‌రించారు. ఈ సైట్ ని నిరుద్యోగులు వాడుకోవాలని కోరారు. ఏ దళారి ని నమ్మకూడదన్నారు.

తెలంగాణ ఈజ్ ఆఫ్ డూయింగ్ బిజినెస్లో మొదటి స్థానంలో నిలిచింద‌ని హోం మంత్రి నాయిని న‌ర్సింహారెడ్డి వివ‌రించారు. అప్రెంటిస్ షిప్ కోసం ట్రైనీ ఉద్యోగులకు నెలకు 1500 రూపాయలు ఇస్తామ‌ని ప్ర‌క‌టించారు. ఆయా కంపెని ఇచ్చే భృతి ఏ కాకుండా కేంద్రం వారిని ప్రోత్సహించాలని వారికి కొంత నిధులు పంపిందని వివ‌రించారు. దానికి తోడుగా అప్రెంటీస్ చేసే వారికి  స్టైఫండ్ తరహాలో తెలంగాణ‌ ప్రభుత్వం 1500 రూపాయలు ఇచ్చి వారిని ప్రోత్సాహం ఇస్తోంద‌ని మంత్రి నాయిని తెలిపారు.