నేడు కడపకు వైఎస్ జగన్..!

  ఏపీ ప్రధాన ప్రతిపక్ష౦, వైసీపీ అధినేత   వైఎస్‌ జగన్‌మోహన్‌రెడ్డి సోమవారం నుంచి ప్రజా సంకల్ప యాత్ర పేరుతో పాదయాత్ర నిర్వహిస్తున్న సంగతి తెలిసిందే. దీనికి సంబంధించిన ఏర్పాట్లన్నీ  జోరందుకున్నాయి. సోమవారం ఉదయం 9.45 గంటలకు వైఎస్సార్‌ ఘాట్‌ నుంచి ఆయన పాదయాత్రకు శ్రీకారం చుట్టబోతున్నారు.

ఇడుపులపాయ నుంచి ఇచ్ఛాపురం దాకా 180 రోజులు మూడువేల కిలోమీటర్లు సాగే ప్రజాసంకల్ప పాదయాత్రకు స్థానిక నేతలు ఏర్పాట్లు చేస్తున్నారు.ఈ క్రమంలో రేపటి నుంచి తలపెత్తనున్న పాదయాత్ర  విజయవంతం కావాలని కోరుతూ శనివారం  తిరుమల వెంకటేశ్వరస్వామిని దర్శించుకున్నారు. ఇవాళ ( ఆదివారం ) మధ్యాహ్నం 1.30 గంటలకు జగన్  కడప విమానాశ్రయానికి చేరుకుంటారు. అక్కడి నుంచి పులివెందులకు వెళ్లి మధ్యాహ్నం 3.30 గంటలకు సీఎస్‌ఐ చర్చిలో ప్రత్యేక ప్రార్థనలు నిర్వహిస్తారు. అక్కడి నుంచి బయల్దేరి సాయంత్రం ఆరు గంటలకు కడప పెద్ద దర్గాలో ప్రత్యేక ప్రార్థనల్లో పాల్గొని తిరిగి ఇడుపులపాయకు వెళతారు. రాత్రికి అక్కడే బస చేసి సోమవారం ఉదయం ప్రజాసంకల్ప యాత్ర ప్రారంభిస్తారు.