కోహ్లీ చిన్నప్పుడు ఆశిష్ నెహ్రా‌తో దిగిన ఫోటో…. ఈ రోజు ఏ స్థానంలో ఉన్నాడో

టీమిండియా కెప్టెన్ విరాట్‌ కోహ్లీ చిన్నప్పుడు సీనియర్ క్రికెటర్ ఆశిష్ నెహ్రా‌తో దిగిన ఫోటో ఒకటి ఈ మధ్య విపరీతంగా వైరల్ అవుతోంది. అంతర్జాతీయ క్రికెట్ నుంచి నెహ్రా రిటైరవుతున్న సందర్భంగా ఇది సోషల్ మీడియాలో హాట్ టాపిక్‌గా మారింది. ఈ విషయం కాస్తా నెహ్రా దృష్టికి వెళ్లడంతో.. ఈ వెటరన్ క్రికెటర్ స్పందించాడు. ‘‘నేను సోషల్ మీడియాలో లేను. అయితే విరాట్ కోహ్లీ ఇవాళ ఏ స్థానంలో ఉన్నాడో దాన్ని బట్టే ఆ ఫోటో అంత పాపులర్ అయింది. లేకుంటే ఏదో గోడకు తగిలించి మరుగున పడిపోయేది. ఇప్పుడు ఆ ఫోటో నాదికాదు… విరాట్ కోహ్లీదే..’’ అని నెహ్రా వ్యాఖ్యానించాడు.

ఆ ఫోటో తీసి ఇప్పటికి 13 ఏళ్లు అవుతోందనీ.. అప్పట్లో దాని గురించి మాట్లాడలేదని గుర్తుచేశాడు. ‘‘ఆఫోటో తీసి 13 ఏళ్లు అవుతోంది. 2009-11‌ సమయంలో నేడు ఆడుతున్నప్పుడు, కోహ్లీ కూడా ఆడుతున్నాడు. అప్పుడూ ఈ ఫోటో ఎవరికీ గుర్తురాలేదు. ఇది మీడియా, సోషల్ మీడియా వ్యవహారం…’ అని నెహ్రా పెదవి విరిచాడు. గతంలో అనేక గాయాలతో సతమతమైన నెహ్రా… మళ్లీ నాలుగేళ్ల తర్వాత ఈ ఏడాది జనవరిలో ఆస్ట్రేలియా పర్యటన ద్వారా అంతర్జాతీయ క్రికెట్లోకి వచ్చాడు. కొద్ది వారాల క్రితమే తాను అంతర్జాతీయ క్రికెట్‌కు గుడ్‌బై చెప్పనున్నట్టు ప్రకటించాడు.