అక్కకు బైక్ కొనాలనే ఆ తమ్ముడి కల… సూపర్

అక్కా తముళ్ల మధ్య ప్రేమ అమూల్యమైంది. అమ్మ తర్వాత అమ్మలా లాలించే అక్క కోసం ఎంతటి త్యాగం చేయడానికైనా తమ్ముడెప్పుడూ సిద్ధమే. దీపావళి కానుకగా తనకెంతో ఇష్టమైన సోదరి కోసం 13 ఏళ్ల ఓ తమ్ముడు ఓ బైక్ కొనిచ్చాడు. అది కూడా తాను దాచుకున్న చిల్లర డబ్బులతో కావడం విశేషం. అక్కకు ప్రేమతో తమ్ముడు చిల్లర సంచులు మోసుకెళ్లి మరీ షోరూంలో బండి కోసం డబ్బులు చెల్లించాడు. ఈ ఘటన గుజరాత్‌లోని రూపాల్‌లో చోటు చేసుకుంది. వివరాల్లోకి వెళితే..

యష్ 8వ తరగతి చదువుతుండగా, ఆయన తండ్రి పిండి మిల్లు నడుపుతారు. అక్కతో కలిసి అమ్మానాన్న ఇచ్చిన పాకెట్ మనీని ఏళ్లపాటు దాచిపెట్టి మొత్తం రూ. 62 వేలు పొదుపు చేశాడు. అమ్మానాన్నకు తెలియకుండా మేనమామ సాయంతో వీరిద్దరూ షోరూంకి వెళ్లారు. సంచుల్లో చిల్లర నింపుకొని షోరూంకెళ్లారు. వాటిని లెక్కించడానికి భయపడిన షోరూం సిబ్బంది తొలుత వాటిని తీసుకునేందుకు నిరాకరించారు.

కానీ ఆ పిల్లాడికి కోపం వచ్చి.. మేనేజర్‌ను కలిసి పరిస్థితిని వివరించాడు. తన అక్క కోసం టూ వీలర్ కొనుగోలు చేయాలని భావిస్తున్నట్టు చెప్పాడు. ఆ తమ్ముడి ప్రేమకు పొంగిపోయిన మేనేజర్ నవ్వుతూ ఓకే చెప్పాడు. దీంతో అక్కకు బైక్ కొనాలనే ఆ తమ్ముడి కల నెరవేరింది