పెళ్లైన తెల్లారే భర్త కళ్లుగప్పి భార్య …. ఏం జరిగింది?

పెళ్లైన తెల్లారే భర్త కళ్లుగప్పి భార్య ఉడాయించిన ఘటన హైదరాబాద్‌లోని కుషాయిగూడ పోలీస్ స్టేషన్ పరిధిలో జరిగింది. పోలీసులు తెలిపిన వివరాల ప్రకారం.. మేడ్చల్‌ జిల్లా కీసర మండలం ఆర్‌ఎల్‌ నగర్‌కు చెందిన మాదినేని తిరుపతయ్య (23) పాల వ్యాపారం చేస్తూ నగరంలో స్థిరపడ్డాడు. అతడు అక్టోబర్ 1న కడప జిల్లా మైదుకూరుకు చెందిన రాజపుత్ర శివమల్లేశ్వరి (19)ని వివాహం చేసుకున్నాడు. మైదుకూరులో స్థానిక రాఘవేంద్రస్వామి ఆలయంలో పెళ్లి చేసుకుని అదే రోజు రాత్రి తన భార్యను హైదరాబాద్‌కు తీసుకొచ్చాడు. మరుసటి రోజు సినిమాకు వెళదామని శివమల్లేశ్వరి ఆప్యాయంగా తన భర్తను కోరింది. తన భార్య ముచ్చట తీరుద్దామని తిరుపతయ్య అక్టోబర్ 2న ఆమెను సినిమాకు తీసుకెళ్లాడు.

సినిమా చూసిన అనంతంరం ఇంటికి తిరిగొస్తుండగా.. మార్గమధ్యంలో ఆగిన మల్లేశ్వరి పిజ్జా కావాలని తన భర్తను అడిగింది. ఆమెను రోడ్డు పక్కనే నిల్చోబెట్టి పిజ్జా తీసుకొని వచ్చేసరికి ఆమె అదృశ్యమైంది. భార్య ఆటోలో వెళ్లిపోతుండగా చూసిన తిరుపతయ్య.. చాలాసేపు అక్కడ గాలించాడు. ఎంత వెతికినా ఫలితం లేకపోవడంతో చివరికి పోలీసులను ఆశ్రయించాడు.