మాజీ ముఖ్యమంత్రిని..‘నువ్వో శాడిస్ట్‌వి’ అంటూ ప్రముఖ గాయకుడు ఫైర్

ప్రముఖ గాయకుడు అద్నాన్‌ సమి జమ్మూకశ్మీర్‌ మాజీ ముఖ్యమంత్రి ఒమర్‌ అబ్దుల్లాపై మండిపడ్డారు. ‘నువ్వో శాడిస్ట్‌వి’ అంటూ ట్విటర్‌లో నోటికొచ్చినట్టు తిట్టిపోశారు. ఇంతకీ ఏం జరిగిందంటే.. శనివారం అద్నాన్‌ శ్రీనగర్‌లోని దాల్‌ లేక్‌ సమీపంలో కచేరీ నిర్వహించారు.

అయితే ఈ కార్యక్రమానికి ఎవ్వరూ రాకపోవడంతో సీట్లు ఖాళీగా మిగిలిపోయాయని ఓ నెటిజన్‌ ట్విటర్‌లో ఫొటోలు పోస్ట్‌ చేస్తూ.. ‘అద్నాన్‌ సమి కచేరీ కార్యక్రమంలో ఖాళీ సీట్లు. మెహబూబా ముఫ్తీ ప్రభుత్వం ఉన్న జమ్మూకశ్మీర్‌కు ఇది అవమానకరం.’ అని ట్వీట్‌ చేశాడు.

ఈ ట్వీట్‌ని ఒమర్‌ అబ్దుల్లా రీట్వీట్‌ చేస్తూ.. ‘ఇది నిజంగానే బాధాకరం. ఆ సీట్లు ఖాళీగా ఉంచకుండా ఉండాల్సింది. ఆ సాయంత్రం అద్నాన్‌ సంగీత కచేరీతో ప్రజలకు మరింత ప్రశాంతత లభించేది.’ అని ట్వీట్‌ చేశారు. ఒమర్‌ ట్వీట్‌కి అద్నాన్‌ స్పందిస్తూ ఆగ్రహం వ్యక్తం చేశారు. దాంతో ఇద్దరూ పరస్పరం తిట్టుకుంటూ ట్వీట్లు విసురుకున్నారు.