ఆ “షో” తో ఫోర్బ్స్ జాబితాలోకి ప్రియాంక

టీవీ షోతో 2017కి గాను భారత్ తరఫున అత్యధిక పారితోషికం అందుకున్న నటిగా బాలీవుడ్ స్టార్ హీరోయిన్ ప్రియాంక చోప్రా నిలిచింది. తాజాగా ఫోర్బ్స్ మ్యాగజైన్ విడుదల చేసిన ఈ జాబితాలో ప్రియాంక టాప్-10లో నిలిచింది. ఒకవైపు బాలీవుడ్‌‌లో సినిమాలు చేస్తూనే.. హాలీవుడ్‌లో ‘క్వాంటికో’ అనే టెలివిజన్ షో‌తో ప్రియాంక‌ అలరించింది. ఈ షో మొదటి సీజన్ లోనే మంచి పేరు తెచ్చుకున్న ప్రియాంక రెండు, మూడు సీజన్లలో కూడా ఆ క్రేజ్‌ని నిలబెట్టుకుంది.

గత ఏడాది జూన్ 1 నుండి ఈ ఏడాది జూన్ 1 వరకు ఈ షో ద్వారా ప్రియాంక అందుకున్న రెమ్యునరేషన్‌ 10 మిలియన్ డాలర్లు అని ఫోర్బ్స్ తాజాగా వెల్లడించింది. ఇందులో యాభై శాతం కంటే ఎక్కువ ఆమెకి వాణిజ్య ప్రకటనల్లో నటించడం ద్వారా లభించినట్లు సమాచారం. ఒక బాలీవుడ్ నటి ఏడాదిలో ఇంత మొత్తాన్ని సంపాదించడం అనేది సాధారణమైన విషయం కాదు. హిందీలో ఒక సినిమాకి ప్రియాంక అందుకునే రెమ్యూనరేషన్ రూ.10 కోట్ల లోపే. అటువంటిది హాలీవుడ్ లో ఒక్క టెలివిజన్ షోతో ఆమె ఇంత పెద్ద మొత్తంలో అందుకోవడం అందర్నీ ఆశ్చర్యపరుస్తోంది. ఇటీవల ‘బేవాచ్’ అనే హాలీవుడ్ సినిమాలో నటించిన ప్రియాంక ప్రస్తుతం ‘Isn’t it Romantic’ అనే మరో సినిమాలో నటిస్తోంది.