స్పైడర్ సినిమా చూసి ఇచ్చిన‌ ఫస్ట్ రివ్యూ..!

టాలీవుడ్ ప్రిన్స్ మహేష్ బాబు..రకుల్ ప్రీత్ సింగ్ జంటగా నటించిన స్పైడర్ పై వచ్చిన ఫస్ట్ రివ్యూ ఈ సినిమాపై అంచనాలను మరింత పెంచుతోంది. ప్రతి టాప్ సినిమాకు విదేశాల నుంచి రివ్యూలు ఇఛ్చే ఉమైర్ సంధు స్పైడర్ సంగతి కూడా తేల్చేశారు. ఇందులో విశేషం ఏమిటంటే ఆయన జైలవకుశ సినిమాకు ఏ రేటింగ్ అయితే ఇచ్చారో.. అదే రేటింగ్ 3.5 ను స్పైడర్ కు కూడా ఇవ్వటం విశేషం. దుబాయిలో కేంద్రంగా ఉండే సినీ విశ్లేషకుడు, సెన్సార్‌బోర్డ్ మెంబర్, ఆసియన్ మూవీస్ మార్కెటింగ్ ఎక్స్‌ పర్ట్ అయిన ఉమైర్ సంధు స్పైడర్‌ సినిమా ఫలితాన్ని చెప్పేశారు.

దసరాకు మహేశ్‌బాబు అభిమానులు స్పైడర్‌తో పండగ చేసుకుంటారని ప్రకటించారు. యాక్షన్ థ్రిల్లర్‌గా తెరకెక్కిన ఈ సినిమా కథ, కథనం.. ప్రేక్షకులను అలరిస్తాయంటున్నారు. సమాజానికి హానికరంగా మారిన ఓ విలన్‌ను అంతమొందించే పాత్రలో మహేశ్ నటించారని, కనిపించకుండా విలన్ చేస్తున్న ఘోరాలకు అడ్డుకట్ట వేస్తూనే, ఆ విలన్‌ ఎవరో కనిపెట్టడం కోసం వేసే ఎత్తులు, విలన్ వేసే పై ఎత్తులు.. ఆద్యంతం ఉత్కంఠను రేకెత్తిస్తాయంటున్నారు. ఈ సినిమా మొత్తంలో క్లైమాక్స్ బెస్ట్ పార్ట్ అని ఉమైర్ సంధు అభిప్రాయం.

ఈ క్లైమాక్స్‌కు ప్రతి ఒక్కరు మెస్మరైజ్ అయిపోతారట. అటు క్లాస్‌ను, ఇటు మాస్‌ను అలరించే విధంగా తయారైన స్పైడర్, ఈ దసరాకు బ్లాక్ బస్టరేనని తేల్చారు. మహేష్ ఎప్పటిలాగానే తనదైన స్టైల్లో సూపర్బ్ యాక్టింగ్ చేశాడని, ఇక విలన్‌గా చేసిన ఎస్‌.జె.సూర్య యాక్టింగ్ కూడా పీక్ స్టేజ్‌లో ఉంటుందని ఉమైర్ చెప్పాడు. హీరోయిన్ రకుల్ ప్రీత్‌సింగ్ కూడా తన పాత్రకు న్యాయం చేసిందనీ, హీరో స్నేహితుడి పాత్రలో ప్రియదర్శి, ఇతర తారాగణం బాగానే ఆక‌ట్టుకున్నార‌ట‌. ఇక దసరాకు మహేష్ అభిమానులు పండగ షురూ చేసుకోవచ్చని చెప్పిన ఉమైర్ స్పైడర్‌కు 3.5 / 5 రేటింగ్ ఇచ్చాడు. మరికొన్ని గంటల్లోనే ప్రేక్షకులు నేరుగా ఫలితాన్ని తెలుసుకోబోతున్నారు.